សហគ្រាសធុនតូចនិងមធ្យម និងសេដ្ឋកិច្ចក្រៅប្រព័ន្ធ ជួបជុំគ្នារៀនសូត្របន្ថែមអំពីការធ្វើអាជីវកម្មនិងឌីជីថល
អង្គការទិន្នន័យអំពីការអភិវឌ្ឍ (អូឌីស៊ី) បានរៀបចំការបណ្ដុះបណ្ដាលសហគ្រាសធុនតូចនិងមធ្យម និងសេដ្ឋកិច្ចក្រៅប្រព័ន្ធ រយៈពេលមួយថ្ងៃពេញ នៅថ្ងៃទី២២ ខែធ្នូ ឆ្នាំ២០២៣ នារាជធានីភ្នំពេញ ដែលមានអ្នកចូលរួមប្រមាណ២៨នាក់ ក្នុងនោះស្ត្រី១៦នាក់ ហើយជាជនជាតិដើមភាគតិច១នាក់។ ការបណ្ដុះបណ្ដាលនេះ គឺជាសកម្មភាពមួយនៃការអនុវត្តគម្រោង “ការពង្រឹងសេដ្ឋកិច្ចក្រៅប្រព័ន្ធ និងសហគ្រាសធុនតូចនិងមធ្យមនៅក្នុងប្រទេសកម្ពុជា តាមរយៈទិន្នន័យបើកទូលាយ និងអក្ខរកម្មឌីជីថល” ដែលទទួលបានជំនួយហិរញ្ញវត្ថុពីមជ្ឈមណ្ឌលសម្រាប់សហគ្រាសឯកជនអន្តរជាតិ (CIPE)។
កម្មវិធីនេះចាប់ផ្ដើមដោយសុន្ទរកថាស្វាគមន៍ពី លោក ធី ទ្រី នាយកប្រតិបត្តិនៃអូឌីស៊ី ដែលលោកមានប្រសាសន៍នាពេលនោះថា «នេះគឺជាលើកទីមួយដែលអូឌីស៊ីមានឱកាសបានជួបជុំជាមួយវិស័យឯកជន រួមទាំងសហគ្រាសធុនតូចនិងមធ្យម។» លោកក៏បានបញ្ជាក់ពីគោលបំណងរួមចម្បងក្នុងការកសាងសមត្ថភាព ដូចជាបង្កើនការយល់ដឹងអំពីគោលនយោបាយ និងបង្កើតវេទិកាពិភាក្សាជាមួយភាគីពាក់ព័ន្ធដើម្បីស្វែងយល់ពីបញ្ហាប្រឈមនិងដំណោះស្រាយនៅក្នុងវិស័យនេះ។ បន្ថែមពីនេះ លោកបានផ្សារភ្ជាប់សហគ្រាសធុនតូចនិងមធ្យម ទៅនឹងឯកសារគោលនយោបាយ និងច្បាប់ពាក់ព័ន្ធ ជាពិសេសយុទ្ធសាស្ត្របញ្ចកោណដំណាក់កាលទី១ បញ្ចកោណទី៣ ការអភិវឌ្ឍវិស័យឯកជននិងការងារ។ លើសពីនេះ នាពេលបច្ចុប្បន្ននិងអនាគត វិស័យឯកជននិងការងាររឹតតែមិនអាចផ្ដាច់ចេញពីការប្រើប្រាស់ឌីជីថល ដែលអាចឃើញពីទំនាក់ទំនងនៅបញ្ចកោណទី៥ គឺការអភិវឌ្ឍសេដ្ឋកិច្ចនិងសង្គមឌីជីថល។
បន្ទាប់ពីសុន្ទរកថានេះ អ្នកចូលរួមបានឈ្វេងយល់បន្ថែមអំពីគម្រោងនិងសកម្មភាពដែលបានអនុវត្តនិងគ្រោងអនុវត្តនៅពេលខាងមុខ។ នៅក្នុងកម្មវិធីនេះ ប្រធានបទដែលជ្រើសរើសយកមកបណ្ដុះបណ្ដាលមានចំនួន៤ ដូចជា
- ទំនួលខុសត្រូវសង្គមរបស់សាជីវកម្ម និងដំណើរការចុះបញ្ជីអាជីវកម្ម ដោយកញ្ញា ស្រី ណាក់ ដៃគូសហការផ្នែកអភិវឌ្ឍន៍អាជីវកម្ម និងអ្នកជំនាញផ្នែកទំនួលខុសត្រូវសង្គមរបស់សាជីវកម្ម នៃក្រុមហ៊ុនមេធាវី សរណ
- កាតព្វកិច្ចពន្ធដារ ដោយអ្នកស្រី ចន្ថា ម៉ារីណែត ប្រធានគ្រប់គ្រងផ្នែកពន្ធដារ នៃក្រុមហ៊ុន អេចអិលប៊ី អឌីត & ផាតនើរ ឯ.ក
- ការបង្កើតមាតិកា និងប្រើប្រាស់មុខងារប៊ូស (Boosting) នៅលើបណ្ដាញសង្គម ដោយលោក ណៃ ម៉ាណេត ប្រធានផ្នែកទំនាក់ទំនងនៃអូឌីស៊ី
- គន្លឹះសុវត្ថិភាពអ៊ីនធឺណិត ដោយលោក ស៊ឺន វិជ្ជរ៉ា មន្ត្រីផ្នែកអភិវឌ្ឍន៍គេហទំព័រ និងព័ត៌មានវិទ្យានៃអូឌីស៊ី។
គួរបញ្ជាក់ថា ការបណ្ដុះបណ្ដាលនេះប្រព្រឹត្តទៅដោយមានការចូលរួមយ៉ាងសកម្មពីអ្នកចូលរួម និងមានពិភាក្សាបន្ថែមអំពីបញ្ហាប្រឈម និងផ្លាស់ប្ដូរមតិយោបល់ចំពោះករណីជាក់លាក់ផងដែរ។ ជាក់ស្តែង អ្នកចូលរួមម្នាក់បានលើកយកករណីការវេចខ្ចប់ដែលគិតគូរពីបរិស្ថាន ស្របពេលដែលអាជីវកម្មមានទំហំតូច និងចំណាយថ្លៃដើមខ្ពស់។ ក្រៅពីនេះ អ្នកចូលរួមផ្សេងទៀតក៏បានសួរណែនាំបន្ថែមពីការគណនាប្រភេទពន្ធខ្លះៗ និងទិដ្ឋភាពបច្ចេកទេសផ្សេងទៀតនៃការប្រើប្រាស់ឌីជីថល។ អ្វីដែលពិសេសជាងនេះ គឺថា អ្នកចូលរួមមិនត្រឹមតែបានរៀនសូត្របន្ថែមពីប្រធានបទខាងលើប៉ុណ្ណោះទេ ពួកគេថែមទាំងបានផ្សារភ្ជាប់ទំនាក់ទំនងជាមួយបណ្ដាអ្នកចូលរួមផ្សេងទៀតដែលប្រកបរបរធ្វើអាជីវកម្មទៅតាមវិស័យរៀងខ្លួនផងដែរ។
ក្រោយពីបញ្ចប់ការបណ្ដុះបណ្ដាលសព្វគ្រប់ ក្រុមការងារអូឌីស៊ីបានស្នើសុំអ្នកចូលរួមទាំងអស់បំពេញការស្ទង់មតិវាយតម្លៃអំពីការបណ្ដុះបណ្ដាលនេះ។ ក្នុងចំណោម១៦មតិដែលបានបំពេញការវាយតម្លៃនេះ យើងសង្កេតឃើញថា ៥៦.៣% នៃអ្នកចូលរួម យល់ស្របថា ការបណ្ដុះបណ្ដាលនេះជិតឆ្លើយតបនឹងការរំពឹងទុករបស់ខ្លួន ស្របពេលដែល៦០%ជាងនៃអ្នកចូលរួមបានវាយតម្លៃ ល្អ ចំពោះការជ្រើសរើសប្រធានបទនិងការបង្រៀនរបស់គ្រូបង្គោល។ ឆ្លៀតក្នុងឱកាសនេះ អូឌីស៊ីសូមថ្លែងអំណរគុណដល់ក្រុមការងាររបស់ក្រុមហ៊ុនមេធាវី សរណ ក្រុមហ៊ុនអេចអិលប៊ី អឌីត & ផាតនើរ និងអូឌីស៊ី ដែលបានចំណាយពេលវេលាដ៏មានតម្លៃចែករំលែកនូវប្រធានបទល្អៗខាងលើនេះ ហើយក៏សូមអរគុណដល់អ្នកចូលរួមទាំងអស់ដែលបានចំណាយពេលវេលា និងចូលរួមសកម្មនៅក្នុងឱកាសនេះ។ គួរបញ្ជាក់ថា បន្ទាប់ពីការបណ្ដុះបណ្ដាលលើកទីមួយដែលធ្វើឡើងនៅរាជធានីភ្នំពេញ អូឌីស៊ីគ្រោងរៀបចំការបណ្ដុះបណ្ដាលនៅតាមបណ្ដាខេត្តផ្សេងទៀតចំនួនពីរ ដែលបើកឱ្យសហគ្រាសធុនតូចនិងមធ្យម និងសេដ្ឋកិច្ចក្រៅប្រព័ន្ធ ជាពិសេសជនជាតិដើមភាគតិច មានឱកាសចូលរួមរៀនសូត្រនិងកសាងសមត្ថភាពដើម្បីធ្វើអាជីវកម្មឱ្យកាន់តែរីកចម្រើន។
